• En base ao novo marco laboral, os efectivos que integran o Pladiga realizarán practicamente as mesmas xornadas que o ano anterior debido ao novo sistema de libranzas

A Consellería do Medio Rural e do Mar garante que este ano o número de xornadas efectivas nos montes galegos será moi similar ao exercizo pasado, mantendo a vixilancia e presenza de persoal en toda a nosa Comunidade. Así o recolle o Plan de prevención e defensa contra os incendios forestais de Galicia (Pladiga 2012) que, dende hoxe, poderán consultar todos os cidadáns na páxina web da Consellería.
 
En base ao novo marco laboral, este ano os traballadores de prevención e extinción librarán 2 días por semana. Deste xeito, cada traballador realizará un total de 66 días de traballo efectivo fronte aos 57 que viñan tendo segundo o antigo sistema de libranzas do total de 92 días de campaña de verán.
 
A estes 5.689 en tempada de máximo risco, hai que engadir o reforzo de persoal do Ministerio, do Exército e dos Corpos e Forzas de Seguridade do Estado ata completar un operativo de máis de 7.000 persoas. No tocante aos medios materiais, contarase con 37 medios aéreos, entre os propios da Xunta e os que aporta o Estado; e 300 medios mecánicos de loita contra o lume, entre os que cabe salientar as 156 motobombas do SPDCIF (Servizo de Prevención e Defensa contra os Incendios Forestais) da Xunta e aos que se engaden cisternas, palas e outros vehículos.
 
Novidades
Como principal novidade cabe destacar a creación de 936 novas prazas de persoal fixo-discontinuo que se veñen a engadir ás 1.500 prazas destas características xa existentes na actualidade. Este cadro de persoal verase incrementado ata ampliar o dispositivo humano garantindo o mesmo número de xornadas efectivas nos labores de loita contra incendios e preservando totalmente o servizo e a presenza de medios materiais e humanos nos montes galegos en base á aplicación do actual réxime laboral. 
 
Entre os axustes introducidos para mellorar o operativo destaca o estudo de emprazamento de cámaras térmicas para a vixilancia e detección de lumes. Asemade, cabe salientar o incremento en 3,4 millóns de euros máis nos labores de prevención, aumentando en 1,4 millóns o orzamento en materia global de prevención e extinción de incendios forestais.
 
No documento -aprobado polo Consello antes da tempada de maior risco de incendios (entre o 1 de xullo e o 30 de setembro)- planifícanse diferentes actuacións concretas para o logro dos obxectivos marcados. Entre elas, a posibilidade de asinar convenios de colaboración para a defensa contra os lumes forestais con entidades como a Federación galega de caza; a realización de cursos on line, para unha mellora da cualificación do persoal; ou un plan de divulgación en centros de ensino de primaria e secundaria, entre outras medidas.
 
Obxectivos
Como obxectivo xeral do Pladiga 2012, mantense o de reducir ao mínimo posible os danos ecolóxicos, económicos e sociais producidos polos lumes forestais, dentro dos recursos dispoñibles. Así mesmo, permanecen os fins complementarios establecidos o pasado ano, que se centran en non superar a media de 3 hectáreas de superficie afectada por lume e, en canto ao tamaño dos incendios, manter o número dos maiores de 25 hectáreas por baixo do 2% do total e a porcentaxe daqueles menores de 1 hectárea por riba do 70% do total. Mantense, ademais, o obxectivo concreto de reducir o número de lumes e a superficie queimada total con respecto da media dos últimos dez exercicios.

Link

http://www.medioruralemar.xunta.es/areas/forestal/incendios_forestais/pladiga_2012/